تاريخ القاهره كله

بوست مهم عن التصوير و التراث و القاهرة 

طويل شوية بس مهم ..

الصورة دي من أهم الصور اللي صورتها علي مدي عشرين سنة تصوير، ممكن في الأول تبص عليها تقول دي شوية عشوائيات . لكن لما تتأملها هتلاقي إن الصورة دي هي بتمثل تاريخ القاهرة كله .. ألف سنة كاملين قدامنا في الصورة دي .. من أول مئذنة جامع ابن طولون و حواليه مدينة القاهرة التاريخية بمآذنها العريقة اللي العالم كله بيحترمها و يقدرها. و قدامها لاندسكيب  لقرافة القاهرة اللي برضو عمرها الف سنة من عمر المدينة و اللي تاريخيا بتمتد خارج أسوار المدينة التاريخية و هنشوف فيها القباب المشهورة لأمراء المماليك و أضرحة الأولياء مختلطة مع مقابر البسطاء و علية القوم علي مدي أزمنة تاريخية تجاوزت ألف سنة . خلف المدينة القديمة بنشوف الإمتداد العمراني لمدينة القاهرة في العصر الحديث من أول محمد علي باشا و حتي الآن و تحول القاهرة لمدينة حديثة ، برج القاهرة و دار الأوبرا و الفنادق العملاقة .. الكلام و الشرح في الصورة دي  لن ينتهي لمتخصصين التراث و العمارة و الفن .. لكن المهم في الموضوع إن الأفكار التي تطرح علي المسؤولين في الدولة من نوعية إزالة هذه المناطق و إحلالها بمباني حديثة هو خطأ فادح .. المناطق دي بتمثل التاريخ الثقافي و الشعبي و السياسي لمدينة عريقة تجاوزت الألف عام .. مدينة من أعرق مدن العالم و هي القاهرة .. أيوة متضحكش علي كلامي ، القاهرة من أعرق مدن العالم و إزالة أحيائها التاريخية و مقابرها هو إزالة و شطب و تدمير لتاريخ المدينة و قيمتها التاريخية و الثقافية .. أنا مش هدفي اني أشتم حد أو أعيب في حد مش دة موضوعي .. أنا هدفي من الكلام دة إني أكلم الناس عشان تفهم يعني ايه لاندسكيب تاريخي بيمثل هوية و ثقافة و تاريخ بلدهم ، و هدفي التاني إني أكلم المتخصصين في التراث الثقافي و التراث المعماري و الفن و التاريخ و المتخصصين في جميع المجالات المعنية أنهم يحاولوا يتحركوا و يتكلموا مع المسؤولين في الدولة و مع الوزراء و الحكومة و يوصلولهم الرؤية و يوضحولهم مدي خطورة الموضوع و مدي أهميته و جديته ..   من حوالي سنة تقريبا كان فيه مقترح لمشروع في الآثار بتفكيك و نقل المنابر المملوكية للمتاحف ، المشروع دة كان هيلغي تماما القيمة التاريخية و الثقافية و التراثية للمنابر كقطع فنية و تاريخية مرتبطة بمكانها اللي هو المسجد ، المهم إن المتخصصين و العلماء و المجتمع المدني المتخصص في التراث أتكلم مع المسؤولين و وضحولهم خطورة الموقف و مدي الضرر المتوقع منه ، عشان كدة القرار دة لم ينفذ و دة كان برضو من خلال مشروع ترميم محترم جدا بيشتغل علي توثيق و ترميم المنابر دي كلها .. اللي قصدي أقوله إن فيه أمل و فيه نتائج إيجابية متوقعة لما الناس تتكلم مع بعضها و تشتغل مع بعضها و نحاول إننا نعمل حاجة نوصل بيها صوت العلم و الرأي العلمي و القيمة العلمية لأصحاب القرار ... و شكرا ..

#kemoculturalwalks