ياريت الناس تفهم

انا حابك تقرأ الكلام ده لإنه مهم جدا من فضلك:

 

زي ما انتم شايفين الوضع العالمي كله في حالة ترقب وكل دقيقة في أخبار جديدة عن فيرس كورونا وده زي ماهو بيعرفك الأخبار في العالم حواليك بيعمل حاجة كمان هي اخطر من الفيروس نفسه وهي " الهلع الجماعي" وعلشان اكون واضح اكثر انا بتكلم ان ممكن هلعك المبالغ فيه يخليك تعمل حاجة هي الأخطر على الإطلاق وهي “سعار الشراء” :

 

اينعم العالم كله في حالة فزع وهلع بس احنا مش في حالة حرب فانت خايف مخزون الموارد يخلص فبتنزل تأمن نفسك وتشتري حاجات انت مش محتاجها على الاقل دلوقتي..علماء الإجتماع بيقولوا ان اسوأ حاجة ممكن تحصل في الكوارث هو الهلع والهيستريا والسبب ان ده ممكن يزود خطر اي ازمة ثلاثة اضعاف وهضربلك مثال بسيط:

 

انت مثلًا بتحتاج ثلاثة علب حليب في الاسبوع ولكن نظرا لخوفك من المجهول فقررت تنزل للبقالة اللي تحت بيتكم وتشتري اربع علب فينزل جارك يعمل زيك وفي ظرف اسبوع السلع بدل ماهي متاحة للجميع انت نقلتها لبيتك وساهمت في افتعال ازمة جديدة هي نقص السلع، ودي بقى مشكلتها انها زي كرة الثلج بتتضاعف كل يوم والناس اعصابها مشدودة كالقوس فعندها استعداد كبير لتصديق اي حاجة وحشة  في ظرف يومين هتلاقي الناس كلها متكدسين في الأسواق فخد عندك بقى انتقال للمرض وجشع تجار وسوق سوداء وحاجات انت مش هتستحملها نهائي..

مش مصدقني بص لأمريكا حاليًا اللي هي اكبر اقتصاد في العالم بتواجه ازمة في اوراق التواليت بسبب اللي بحكيلك عليه ده..

 

 

اللي عاوز اوصلهولك انك حقك تخاف وتقلق على نفسك وبيتك وحياتك بل بالعكس انا بشجعك على الحرص.. لكن ده مش معناه انك تختلق ازمة احنا مش قدها دلوقتي.. احنا مش في حالة حرب وخلاص حدودنا هتتقفل او هنعيش في عالم من اكلي لحوم البشر فانت مضطر تقفل على نفسك مخبأ تحت الأرض فهتنزل تشتري سلع..

 

ارجوك تاني متجزعش ومتنزلش تشتري غير اللي انت محتاجه وسيب فرصة لغيرك هو كمان ياخد حصته وبكده الامور هتفضل طبيعية زي مكانت امبارح واول . مفيش حاجة حواليك اتغيرت ممكن تأثر على كمية السلع المتاحة..

  

انا بقولك الكلام ده ليه؟

الازمة الحالية مطولة معانا شوية ووارد جدا بل حتما ويقينًا هتلاقي كل يوم إجراءات جديدة للحد من انتشار الفيرس وحظر التجوال مش بعيد عننا خالص عننا فكل ما حضرتك تكون واعي وعلى قدر المسؤولية الازمة هتعدي بأقل الخسائر.. اتمنى نبطل شوية موضوع يلا نفسي ده لإن حقيقي انت اول واحد هتندم لو عملت كده..

 

هو طريق هنقطعه شئنا ام ابينا، فيا نقطعه كله مطبات ونطلع منه مُحطمين يا نقطعه بعقل ووعي وتحمل للمسؤليه، وهنا فقط هيكون العبور بأقل الخسائر..

صدقًا انا بتمنى الكلام ده يوصل للناس كلها لعله يكون عامل ولو بسيط في نشر الوعي لعبور الأزمة اللي انا متيقن انها هتعدي!

#محمد_دربالة